Иван Бимбиловски докторира правни науки на ЦЕУ во Будимпешта, Унгарија, одбранувајќи ја докторската дисертација со Magna cum Laude. Како докторски кандидат, престојува неколку семестри на Хумболт универзитетот во Берлин, Германија и Универзитетот во Торонто, Канада. Постдокторски истражувања врши на Универзитетот на Мичиген во Ен Арбор, САД.

Работи како консултант за еминентни меѓународни организации, меѓу кои и за Совет на Европа, ОБСЕ, НАТО, Светска банка, УСАИД и ГТЗ, како и за познати локални истражувачки центри, како што е Агенцијата Рејтинг и Центарот за истражување и креирање политики. Д-р. Бимбиловски е сертифициран медијатор, регистиран при Комората на медијатори на Македонија. Избран е и за предавач на Академијата за судии и јавни обвинители.

Автор е на повеќе трудови, меѓу кои и “Воени и вонредни состојби во споредбена уставна перспктива,“ во издание на Lambert Academic Publishing од Келн, Германија; „Уставна политика во Македонија,“ во издание на New York University Law School, „Расчленување на мантрата или што мислиме кога велиме слободни и фер избори,“ „Политичката економија на судските реформи,“ и „Финансирањето на изборните кампањи според новиот изборен законик на Република Македонија – Апел за Македонски Buckley v. Valeо…и повеќе од тоа,“ сите во издание на Konrad Adenauer Stiftung; „ГПКТ Водич за прекугранична трговија,“ во издание на East West Institute; „Миграции во Југоисточна Европа“ (ко-автор) во издание на Grupa 484; „Вовед во правото,“ Цетис, итн.

Учествува на голем број на меѓународни семинари и конференции на кои што презентира свои трудови, вклучително и оние на тема: Европски интеграции (Прага, Чешка); Соработка меѓу владата и невладиниот сектор (Исик-кул, Киргистан); Избори (Краков, Полска); Академско пишување (Варшава, Полска); и Економија и демократија (Дубровник, Хрватска).

Добитник е на многубројни школарини и стипендии, меѓу кои и оние на Вајзер центарот за Европа и Евроазија, Министерството за образование и наука на Република Македонија и Институтот отворено општество.